28/7/12

A Berenguela olla cada paso que me leva ata os seus pés. Arrastro os tacóns ata sentar nas escaleiras. Son moitas as noites sen durmir e o corpo canso pide tregua, mais eu sei que a cabeza non vai colaborar. Reescribirei palabras, soñarei apertas e preguntarei sen agardar resposta. Logo sairei á rúa buscando uns ollos que foxen dos meus. E por máis que pregunte, ningún son sairá dos meus beizos e ningunha resposta chegará a min.

Un día crucei esta praza baixo o seu abrazo. Hoxe ninguén virá. E eu estou tan cansa...

12/7/12

O mundo está a xirar máis rápido do que debera. Todo cambia, todo cambia rápido de máis.

Teño medo dos cambios. Cambiei eu? Foi bo ese cambio? Medo da resposta, medo do cambio, medo de non saber plantarlle cara á nova realidade.

Todo vai rematando, as cousas que quería xa non están. Aférrome ás lembranzas dun tempo de felicidade que xa pasou. Teño medo de esquecelas e que se perdan para sempre. Tamén teño medo de lembralas e non aturar a dor da súa perda.

Demasiado rota para comezar a vivir de novo. Demasiado asustada. Demasiado soa.

Só resta agardar un novo xiro das rodas celestes...